‘ಕನ್ನಡ ಮಾತೃವಾಣಿ’ಗೆ ೨೮ ವರ್ಷ ತುಂಬಿತು.
‘ಕನ್ನಡ ಮಾತೃವಾಣಿ’ ಎಂದೇಕೆ ಹೇಳುವುದು? ‘ಮಾತೃವಾಣಿ’ ಎಂದರೆ ಸಾಕಿತ್ತಲ್ಲ!?
ಇಲ್ಲ. ಸಾಲದು. ‘ಮಾತೃವಾಣಿ’ ಎಂಬುದು ಒಟ್ಟು ೭ ವಿದೇಶಿ ಭಾಷೆಗಳಲ್ಲಿ ಮತ್ತು ೧೦ ಭಾರತೀಯ ಭಾಷೆಗಳಲ್ಲಿ ಹೊರಬರುತ್ತಿರುವ ಆಧ್ಯಾತ್ಮಿಕ ಪತ್ರಿಕೆಯಾಗಿದೆ. ಅವುಗಳಲ್ಲಿ ಕನ್ನಡ ಪತ್ರಿಕೆಯೂ ಒಂದು.
ಪ್ರತಿಯೊಂದು ಭಾಷೆಯ ಪತ್ರಿಕೆಯ ಒಕ್ಕಣೆಯಲ್ಲಿ ವೈವಿಧ್ಯತೆಯಿರುತ್ತದೆ, ಆಯಾ ಭಾಷೆ ಪ್ರಾಂತ್ಯಗಳಿಗೆ ಅದು ಅನುಯೋಜ್ಯವಾಗಿರುತ್ತದೆ. ಆದ್ದರಿಂದ ‘ಕನ್ನಡ ಮಾತೃವಾಣಿ’ ‘ಮಲಯಾಳಂ ಮಾತೃವಾಣಿ,’ ‘ಇಂಗ್ಲೀಷ್ ಮಾತೃವಾಣಿ’ ‘ಜಪಾನೀಸ್ ಮಾತೃವಾಣಿ’ ‘ಫ್ರೆಂಚ್ ಮಾತೃವಾಣಿ’ ಎಂದು ಪ್ರತ್ಯೇಕವಾಗಿ ಹೇಳಲೇಬೇಕಾಗಿದೆ.
ಈಗಾದರೋ ಜನರ ಕೈಯಲ್ಲಿ ಮೊಬೈಲ್ ಇರುತ್ತದೆ; ಜಗತ್ತಿನ ಯಾವ ಭಾಷೆಯಲ್ಲಿ ಬೇಕಾದರೂ, ಜಗತ್ತಿನಲ್ಲಿ ಯಾರೊಂದಿಗೆ ಬೇಕಾದರೂ ಲೈವ್ ಸಂಪರ್ಕ ಹೊಂದಬಹುದು. ಆದರೆ ದಶಕಗಳ ಹಿಂದೆಯೇ ಕೇರಳದ ಪರ್ಯಾಯದ್ವೀಪವೊಂದರ ಕುಗ್ರಾಮವೊಂದರಲ್ಲಿ -ಇಂದಿನ ಅಮೃತಪುರಿಯಲ್ಲಿ- ಪ್ರಿಂಟಿಂಗ್ ಪ್ರೆಸ್ ಇತ್ತು, ಅದು ಪರಮಪೂಜ್ಯ ಅಮ್ಮನವರ ಸಂದೇಶವನ್ನು ಹಲವಾರು ಭಾಷೆಗಳ ಪತ್ರಿಕೆಯ ಮುಖಾಂತರ ಲೋಕಕ್ಕೆ ಪ್ರಸಾರ ಮಾಡುತ್ತಲಿತ್ತು ಎಂದರೆ ನಿಮಗೆ ಅಚ್ಚರಿಯಾಗದೆ?
‘ಮಾತೃವಾಣಿ’ ಪತ್ರಿಕೆ ಮಾತ್ರವಲ್ಲ. ಅಮ್ಮನ ಭಜನೆಗಳನ್ನು ವಿವಿಧ ಲಿಪಿಗಳಲ್ಲಿ ಹಾಗೂ ಭಜನೆಗಳ ಅರ್ಥವನ್ನು ವಿವಿಧ ಭಾಷೆಗಳ ಪುಸ್ತಕಗಳಾಗಿ ಆಶ್ರಮದ ಪ್ರೆಸ್ಸು ಅಂದೇ ವಿಪುಲವಾಗಿ ಪ್ರಕಟಿಸುತ್ತಿತ್ತು. ಗುರುವಾಗಿ ಅಮ್ಮ ನೀಡುವ ಬೋಧನೆಯ ಸಂಕಲನಗಳನ್ನೂಅಂದೂ ಪ್ರಕಟಿಸುತ್ತಿತ್ತು, ಇಂದೂ ಪ್ರಕಟಿಸುತ್ತಿದೆ.
ಕಾಲ ಬದಲಾದಂತೆ ಅಮ್ಮನ ಸಂಕಲ್ಪಕ್ಕೆ ಅನುಸಾರವಾಗಿ ಸಂದೇಶ, ಭಜನೆ, ಉಪದೇಶಗಳೆಲ್ಲವೂ ಮುದ್ರಣ ಮಾಧ್ಯಮದಲ್ಲಿ ಮಾತ್ರವಲ್ಲದೆ, ಇಂದಿನ ವಿವಿಧ ವಿದ್ಯುನ್ಮಾನ ಮಾಧ್ಯಮಗಳ ಮುಖಾಂತರವೂ ಜನತೆಯನ್ನು ತಲುಪುತ್ತಿವೆ.
‘ಮಾತೃವಾಣಿ’ ಪತ್ರಿಕೆ ಸಹ ಆನ್-ಲೈನ್ ಲಭ್ಯವಿದೆ. ಸದಸ್ಯತ್ವ ಪಡೆದು, ಅಮ್ಮನ ಸತ್ಸಂಗ ಸಂದೇಶಗಳ ಲಾಭಾರ್ಥಿ ನೀವಾಗಿರಿ.
~ ಸಂಪಾದಕ ವರ್ಗ